PRAESENTATIO

Academia Latinitati inter omnes gentes fovendae, ab Instituto Nationali Studiis Romanis provehendis anno MCMLXVII condita, nomen sibi imponit Academiae Latinitati Fovendae.

Ei propositum est promovere et amplificare, in gradu nationali et internationali, quodvis inceptum ad cognitionem linguae, litterarum, cultus civilis Latini aptum per libros et commmentarios editos necnon per habitas acroases et conventus celebratos.

Sermo publicus Academiae est Latinus. Verumtamen in coetibus, in scriptorum editione, in conventibus ab Academia apparatis, exceptis relationibus plenariis a sodalibus Academiae proferendis, licet hisce linguis aetate nostra vigentibus uti: Anglica, Gallica, Gemanica, Hispanica, Italica.